Headline Humaniora

Maen Pukulan Betawi, Buat Datengin Anak Cucu Kompeni



single-image
 INDOWORK.ID, JAKARTA: Jangan ngaku anak Betawi kalau kagak tau maén pukulan. “Di balé baca Quran, di pelataran maén pukulan” itu udé jadi semboyan orang Betawi.
Mangkéyé waktu diajak Bang Lahyanto Nadie pasang kudé kudé buat maén pukulan, ayé siap ajé. Ada teman senior yang nemenin. Lapangan Banteng jadi seksinyé.
Engkong kité dulu maén pukulan buat jaga diri, buat bikin badan sehat, biar adé otot. Namanya juga laki, musti berotot. Dulu maén pukulan buat bela nyang lemah, rakyat yang ketindes amé penjajah, amé VoC, Kumpeni.
Sekarang maén pukulan buat olahraga, jaga diri juga. Maén pukulan itu pan seni juga, warisan leluhur nyang musti dijagé, dijadiin tontonan Palang Pintu, nyambut tamu tamu amé orang nyang mau kawin caré Betawi. Sama buat ngedatengin turis juga.

JAMAN UDEH BEROBAH

Itu dié. Pan jaman udah berobah, mangkényé semue nyang adé dulu, diubah fungsinyé Dulu kumpeni musuh, sekarang udah pada pegi. Tinggal anak cucu mereka, yang ada cerité sejarah sama engkong mereka.
Penjajah Kumpeni udah pada pulang. Jepang juga. Tanah Betawi amé negeri Indonesia udah merdeka. Mangkényé pegimané supaya kemerdekaan dijage sebaék-baéknya. Supayé anak cucu idupnya kagak blangsak kayak jaman engkong engkong kité dulu.
Kompeni ninggalin banyak bangunan bagus, besejarah, yang sekarang musti dirawat, dijadiin tontonan. Buat ngingetin sejarah juga.
Nyang jelek jelek dilupain ajé. Nyang baék baék buat pelajaran. Penjajahan ‘kan lamé sebab kita masi bodo, kagak besatu, kita lemah. Itu aje ambil hikmahnyé.
Ke depan kita musti bikin kuat, kompak, kagak jalan kendiri kendiri. Nambah kepinteran.
Selaén bangun kota di deket laut, nyang sekarang jadi Kota Tua, Kompeni juga bangun kota di tengah Jakarté, nyang sekarang ada di puteran Monas. Lapangan Banteng (‘Buffelsveld’), Gedung Pos (‘Post en Telegrraf’), Gedung Kesenian Jakarta (‘Batavia Schouwburg’), bangunan Kementrian Keuangan (‘Paleis Te Weltevreden’ atawa ‘Witte Huis’ alias gedung putih) semua ada di tengah Jakarte. Sekarang disebutnye Weltevreden.
Weltevreden itu dulunya tempat mukim buat bangse Eropa di pinggiran Batavia, Hindia Belanda amé pusat pamerintahan Indie Belande di jaman Gubernur Jenderal Daendels (Herman Willem Daendels). Lokasinyé 10 kilometer dari Batavia lama ke selatan. Sekarang ya Monas itu, dari RSPAD Gatot Subroto (Gedung Stovia), Lapangan Banteng, ampe Museum Gajah.
“Aye inget waktu jaman jadi kenek bus di sini, “ kenang Bang Lahyanto Nadie, jurnalis senior alumni Bisnis Indonesia. Lapangan Banteng pada tahun 1980-an jadi terminal bus, pusat Jakarté. “Jualan koran, jadi kenék bus Saudaranta, aye alamin sembari sekolah, “ ceritanye.
Sebelonnya, di zaman Kumpeni, Lapangan Banteng itu utan rata banyak rumputnyé, nyang punyé Anthony Paviljoen, mangkenye dikasi nama Paviljoenved. Utan rumput milik Paviljoen dipaké buat piaré kebo, sapi, sama kambing. Di jaman Paviljoen dia bikin juga rumah rumah rehat (vila).

MILIK ANTHONY PAVILJOEN

Asep Kambali, sejarawan dan pendiri Komunitas Historia Indonesia, di masa lalu, kawasan milik Anthony Paviljoen masih utan. Macan, buayé, masing banyak di situ, katenyé. Mangkenye orang orang Eropé, bangsa kulit putih, bangun vila-vila di Jalan Pangeran Jayakarté, ke arah Ps. Baru, dié cerité lagi.

Nyang kité sebut Lapangan Banteng sekarang, dulunye itu lapangan kerbau (‘Buffelsveld’). Sebutan laennya “Champs de Mars”, lapangan nyang kebuka ame ijo.
‘Weltevreden’ alias “Well Pleased” nyang artinyé tempat yang resep. Bikin puas. Sempet dijadiin kebon tebu amé kopi, pakai tenaga orang mardijkers.
Dari sono, pada ngebangun pemukiman di Tenabang, Gondangdia, Nieuw-Gondangdia, ame Meester Coruelis, nyang sekarang disebut Jatinegara. Orang orang elit Belanda mukim di sané.
Beda amé nyang di Distrik Batavia (Kota Tua) nyang banyak ditinggalin penguasé VoC ame Betawi suséh, di Weltevreden alias Nieuw Batavia (Kota Baru) dijadiin tempat orang elit Eropa. Orang orang suséh jaoh dari jalanan.
Sekarang, kumpulan jurnalis senior ibukota mau ngidupin nostalgia Weltevreden. Kasi hormat amé orang orang yang bangun gedung bagus, buat ngingetin sejarah lamé Betawi.
Dipeloporin ame Bang Toto Irianto, senior di koran Pos Kota ame ayé, Dimas Supriyanto Martosuwito, Bang Lahyanto Nadie, ade pendiri dan pengurus laen; Marthen Selamet Susanto,  Hamzah Ali, Firdaus Baderi, Mohammad Fauzy, Christian Chang, Arief Soeharto, Endy Subiantoro, Muhammad Ashraf Ali, I Made Karmayoga, amé Goenawan Wibisono.

YAYASAN JAKARTA WELTEVREDEN

Para pendiri Jakarta Weltevreden dengan jurus Jalan Enam
Terus kité bikin Yayasan Weltevreden Jakarta. Bang Lahyanto Nadie, nyang asli Betawi kita jadiin Ketua Dewan Pengawas Yayasan Kota Jakarta Weltevreden.
Mangkényé di Lapangan Banténg, Kamis Siang, 22 Juni jam 2 siang taon 2022 (cakep banget angkényé!), barengan hajatan ngeraya’in harijadi Kota Jakarta ke 495, kita maén pukulan. Wakil Walikota Jakarta Pusat, Bang Irwandi amé Bang I Made Karmayoga, pejabat DKI, Kepala BKD di jaman Ko Ahok BTP, ikut hadir ngerayain. Pasang kudé kudé.
Jaman dulu maén pukulan buat ngelawan Kumpeni, sekarang buat ngundang anak cucu Kumpeni.
Bukan buat diajak berantem atawa bengkelai, tapi buat jalan jalan. Ngejongjon.
Pan kité udah pada damai. ***
Ditulis oleh Dimas Supriyanto, Founder Jakarta Weltevreden.

Tinggalkan Komentar

Your email address will not be published.

Berita Lainnya